Jańa basseın sýdy jylytatyn jáne tazartatyn zamanaýı tehnologııalyq qural-jabdyqpen qamtamasyz etilgen. Barlyq standarttarǵa saı etilip jasalǵan basseınniń uzyndyǵy 25 metrdi, eni 11 metrdi quraıdy. Munda bir mezgilde 50-ge tarta adam qatar júze alady.
Qazirgi tańda bul jerde 25 adam eńbek etedi. Basseınnen bólek, ǵımaratta jattyǵý jáne tennıs zaldary, demalys orny, kıim aýystyratyn jáne jýynatyn bólmeler bar. Baǵasy da qarapaıym halyqtyń qaltasy kóteretin deńgeıde.
Abaılyqtardy qýanyshqa bólegen bul sporttyq keshenniń qurylysyna oblystyq jáne aýdandyq bıýdjetten 430 mln teńge jumsaldy. Basseın qurylysyn merdiger kompanııa «Naladochnyı sentr Temırtaý» JShS júrgizip, sapaly etip bitirgen.
Aıta ketý kerek, bul ǵımarattyń boı kóterýine aýdandyq ardagerler uıymy men aqsaqaldar keńesiniń Elbasynyń atyna jazǵan haty sebepshi bolǵan edi. Sonyń arqasynda 2014 jyly sport kesheniniń jobalaý-smetalyq qujattamasy daıyndalyp, qurylys jumystary júrgizile bastaǵan bolatyn.
Jalpy, Abaı aýdanynda buqaralyq sportty damytýǵa, salamatty ómir saltyn qalyptastyrýǵa aıryqsha kóńil bólinedi. Munda turǵyndardyń sportpen shuǵyldanýy úshin barlyq jaǵdaı jasalǵan deýge bolady. Aýdannyń sporttaǵy jetistikteri de aýyz toltyryp aıtarlyqtaı. Mysaly, abaılyq sportshylar oblys kólemindegi spartakıada jarystarynda únemi úzdik úshtiktiń ishinde júredi. Sondaı-aq osy aýdandaǵy sport mektebiniń túlekteri halyqaralyq arenada Qazaqstannyń namysyn laıyqty qorǵap, tolaıym tabystarǵa qol jetkizgen. Atap aıtar bolsaq, Serik Nurqazov, Serik Sápıev, Abylaıhan Júsipov jáne basqa da sport sańlaqtardyń Abaı boks mektebiniń jaqsy atyn aıdaı álemge jaıǵany tarıhı shyndyq.
«Aýdanda sportqa degen kózqaras erekshe. Salamatty ómir saltyn ustanǵan turǵyndarymyzǵa qoldan kelgen jaǵdaıdyń bárin jasaýǵa tyrysamyz. Keleshekte 320 oryndyq deneshynyqtyrý-saýyqtyrý keshenin salý josparda bar», deıdi Abaı aýdanynyń ákimi Baýyrjan Asanov.
Qaırat ÁBILDA,
«Egemen Qazaqstan»
Qaraǵandy oblysy,
Abaı aýdany
